பஞ்சாமிர்தம்

பஞ்சாமிர்தம்

இன்று (ஜூன் 20) பௌர்ணமி

1 “ரைஸ் ராமா”வை தெரியுமா?

சென்னை மயிலாப்பூரைச் சேர்ந்த ஆர்.ராமச்சந்திரன் (51) இந்தியன் ஓவர்சீஸ் வங்கி வேலையைத் துறந்து ஏழைகளுக்கு விநியோகம் செய்வதற்காக அரிசி சேகரிக்கிறார். ஒவ்வொரு நாளும் அவர் தனது பழைய ஸ்கூட்டரில் துணிப் பைகளுடன் புறப்படுகிறார். ஒரு மாதத்தில் அவர் நகரின் பல்வேறு பகுதிகளில் சுமார் 600 குடும்பங்களை அணுகுகிறார். அவரது பட்டியலில் உள்ள ஒவ்வொரு குடும்பமும், சமைப்பதற்கு முன் தினமும் ஒரு கைப்பிடி அரிசியை (பிடி அரிசி) சேமித்து வைக்கிறது. இதை மாதம் ஒருமுறை ராமச்சந்திரன் வந்து சேகரிக்கிறார். மொத்தத்தில் அவர் 200 கிலோ அரிசியை ஆதரவற்ற பெண்கள், அனாதை குழந்தைகள் ஆகியோரைப் பராமரிக்கும் 25 நிறுவனங்களுக்கும், சில வேத பாடசாலைகளுக்கும் விநியோகிக்கிறார். ராமச்சந்திரன் தனது சேவா காரியத்தில் மனைவி உமாவையும் மகன் குருராகவனையும் ஈடுபடுத்துவதில் வெற்றி கண்டுள்ளார். ஏழைகளுக்கு உணவளிப்பதற்காக மகாஸ்வாமி (மறைந்த காஞ்சி சங்கராச்சாரியார் ஸ்ரீ சந்திரசேகரேந்திர சரஸ்வதி ஸ்வாமிகள்) துவக்கிய பிடி அரிசி திட்டத்தை வாழ்நாள் முழுவதும் தொடர்வேன் என்று அவர் கூறுகிறார். இதற்கிடையில், அவரது திட்டத்தின் பயனாளிகள் அவரை அன்புடன் ‘ரைஸ் ராமா’ என்று அழைக்கிறார்கள்

ஆதாரம்: தினமணி, ஆகஸ்ட் 3, 2004.

2 அரசியல் அரங்கில் இது அரிய காட்சி

ஒடிசாவில் பிஜு ஜனதா தளத்தின் (பிஜேடி) நவீன் பட்நாயக் 24 ஆண்டுகளுக்குப் பிறகு, இப்போது தலைமைப் பொறுப்பில் இருக்க மாட்டார். மாறாக, முதல் முறையாக பாஜக முதல்வர் ஒருவர் மாநில அரசை வழிநடத்துவார். ஜூன் 12 அன்று முதலமைச்சர் பதவியேற்பு விழாவில் கலந்துகொண்ட முன்னாள் முதல்வர் தோல்வியை கண்ணியமாக எதிர்கொண்டார். பதவியேற்பு விழாவிற்கு, நவீன் பட்நாயக்கை அழைக்க பாஜக முடிவு செய்தது. புதிய முதல்வர் மோகன் சரண் மாஜி ஒரு படி மேலே சென்று நவீன் பட்நாயக்கை நேரில் சந்தித்து அழைப்பிதழை வழங்கினார். பட்நாயக் ஒடிசாவின் பிதாமகர். அந்த  தகுதிக்கு ஏற்ப அவர்  ஆரவாரத்துடன் மேடையில் வரவேற்கப்பட்டார். மத்திய உள்துறை அமைச்சர் அமித் ஷா அவரை அன்புடன் வரவேற்க முன் சென்றார், மத்திய அமைச்சர்கள் நிதின் கட்கரி, ஜேபி நட்டா ஆகியோர் அவரை கரம்கூப்பி வரவேற்றனர். பதவியேற்பு விழாவுக்குப் பிறகு, நவீன் பட்நாயக்குடன் பிரதமர் மோடி அளவளாவினார். மோடி-நவீன் நெருக்கமான நட்பை மக்கள் பார்க்க முடிந்தது. நவீன் பட்நாயக் புதிய முதல்வரை மனதார வாழ்த்தினார். பாஜகவின் மோகன் மாஜி ஒடிசா முதல்வராக பதவியேற்ற நாளில், “அவரது தலைமை, ஆற்றல், திறன் ஆகியவை ஒடிசா மக்களின் சேவையில் உதவும் என்று நான் நம்புகிறேன்” என்றார் நவீன் பட்நாயக்.

 ஆதாரம்: indiatoday.in ஜூன் 13, 2024.

3 ரேவதி சங்கரனின் ‘தலை’யாய பொழுதுபோக்கு

த ஹிந்து, ஜனவரி 14, 2016  செய்தி: புற்றுநோயால் பாதிக்கப்பட்ட மக்களுக்கு அன்பின் அடையாளமாக, கேரளா கோழிக்கோடு பிராவிடன்ஸ் மகளிர் கல்லூரியைச் சேர்ந்த 13 மாணவிகள் வளாகத்தில் ஏற்பாடு செய்யப்பட்ட நிகழ்ச்சியில் தங்கள் தலைமுடியை தானம் செய்தனர். நகரத்தில் உள்ள முன்னணி அழகு நிலையத்தை சேர்ந்த அழகுக்கலை நிபுணர்கள் பெண்கள் தானம் செய்ய முடியை வெட்டி பேக் செய்து உதவினர். கீமோதெரபியின் பக்கவிளைவு அதிகம் முடி உதிர்தல். ஒரு பெண்ணுக்கு, இது உண்மையில் ஒரு வேதனையான அனுபவம். இளம் பெண்களின் தன்னார்வ ஆதரவு இதுபோன்ற போராடும் பெண்களுக்கு ஒரு பெரிய ஆறுதலாக இருக்கும். (20 வருடங்களுக்கு முந்தைய இதே போன்ற ஒரு செய்தி இது: “சென்னையைச் சேர்ந்த தொலைக்காட்சி கலைஞர் ரேவதி சங்கரன் சில நுண்கலைகளிலும் வல்லவர். அவர் சில நாட்டுப்புற கலை வடிவங்களின் விரிவுரையாளர். இதழியல் மாணவி ஒருவருக்கு அளித்த பேட்டியில் ரேவதி தனது பொழுதுபோக்கு என்று குறிப்பிட்டது மனித முடி சேகரிப்பு. கேன்சர் நோயாளிகள் மிக இளம் வயதிலேயே முடி உதிர்ந்து வழுக்கையாகி விடுவார்கள். அடையாறில் உள்ள புற்றுநோய் ஆராய்ச்சி மையத்திற்கு தன்னார்வத் தொண்டராக இருந்த ரேவதி, ஆறுதல் அளிக்கும் விஜயங்களின் போது அதைக் கவனித்தார். இந்த மையத்தில், உதிர்ந்த முடியை விக் ஆக மாற்றும் ஒரு கருவி உள்ளது என்பதை அறிந்தார். அதன் பிறகு, தினமும் தலைசீவும் போது உதிரும் முடியை கவனமாக சேகரித்து மையத்திற்கு அனுப்புமாறு சந்திக்கும் அனைவரிடமும் வலியுறுத்த ரேவதி சங்கரன் தவறுவதில்லை”).

4 காந்திமதியின் பார்வையில் கடவுள் அருள்

மதுரை கிழக்கு மாசி வீதி எண்ணெய்க் கடைக்கு எதிரே உள்ள தூசி படிந்த நடைபாதையில், பசியுடன், வறுமையுடன், நோய்களுடன் போராடும் ஆதரவற்றவர்களுக்கு – வெஜ் பிரியாணி, மோர் / பால் – பரிமாறுகிறார் ஸ்ரீமதி காந்திமதி. சில வருடங்களுக்கு முன் தொழில் நொடித்துப் போன தையல்காரரின் 64 வயது மனைவி இவர், கடந்த 12 வருடங்களாக இது அவருக்கு அன்றாடக் கடமை. ஏழைகளுக்கு உணவளிக்க காந்திமதியிடம் வசதி இல்லாமலிருந்தது. 12 ஆண்டுகளுக்கு முன் சமூக சேவகர் சிவா அன்பானந்தன் பிச்சைக்காரர்கள், மனநலம் / உடல் ஊனமுற்ற நபர்கள், ஏழைகள், கைவிடப்பட்டவர்கள் ஆகியோருக்கு உணவு பரிமாறுவதைக் கண்டார். சிவா அன்பானந்தன் சமையல்காரரைத் தேடிக்கொண்டிருந்தார். காந்திமதி உடனடியாக முன்வந்தார். அப்போதிருந்து, இவர் ஒரு நாள் கூட ஓய்வு எடுக்கவில்லை. தனக்கு ஜுரம் வந்த போதும் உணவைத் தயாரித்து, அது மக்களுக்கு உரிய நேரத்தில் சென்றடைவதை உறுதி செய்கிறார். 2013-ல் சிவ அன்பானந்தன் சாதம், சாம்பார், தயிர் ஏற்பாடு செய்துவிட்டு உயிர் பிரிந்ததை காந்திமதி வருத்தத்துடன் நினைவுகூர்ந்தார். “சுடுகாட்டுக்குச் செல்வதற்கு முன்பு நான் இங்கே சாப்பாடு பரிமாறினேன்” என்று அவர் கூறுகிறார். இன்று அருகிலுள்ள கடைக்காரர்களில் ஒருவர் காய்கறி வாங்குகிறார், யாரோ அரிசி, எண்ணெய் நன்கொடையாக வழங்குகிறார்கள். அது ஒவ்வொரு நாளின் தேவையையும் பூர்த்தி செய்ய உதவுகிறது. இத்தனை ஆண்டுகளாக பொருட்களை தடையின்றி ஏற்பாடு செய்வதில் கடவுளின் அருள் இருப்பதாக காந்திமதி நம்புகிறார். வழிப்போக்கர்கள் கூட என்ன நடக்கிறது என்பதைப் பார்க்க நின்று, இனிப்புகளையும் பழங்களையும்; தட்டுகள், டம்ளர்கள் பந்திப் பாய்கள் போன்றவற்றையும் வழங்குகிறார்கள்.

ஆதாரம்: த ஹிந்து, ஜனவரி 3, 2014.

5 நாரதர் பெயரால் அருவி – அமெரிக்காவில்

நாரதா அருவி அமெரிக்காவின் வாஷிங்டன் நகரை அடுத்த மவுண்ட் ரெய்னர் தேசிய பூங்காவிற்கு கிழக்கே சுமார் 17 மைல் தொலைவில் உள்ளது. ஒரு மைல் தொலைவில் பாரடைஸ் நதி. பாரடைஸ் செல்லும் சாலையில் இருந்து 150 அடி தொலைவில், நாரதா அருவி பூங்காவில் கார் மூலம் அணுகக்கூடிய மிகப்பெரிய அருவி. இது மிகவும் ஈர்க்கக்கூடிய அருவி. இது முன்பு குஷ்மன் அருவி என்று அழைக்கப்பட்டது, ஆனால் பெயர் பரவவில்லை. 1893 ஆம் ஆண்டில் மேற்கு வாஷிங்டனின் தியசோபிகல் சொசைட்டியின் நாரதா கிளையால் இந்த நீர்வீழ்ச்சிக்கு நாரதா என்று பெயரிடப்பட்டது. நாரதர் ஒரு ஹிந்து குரு. நாரதா என்ற ஹிந்து வார்த்தை “தூய்மையான” அல்லது “மாசுபடுத்தப்படாத” என்று பொருள்படும். இந்த அருவி வானத்துக்கும் பூமிக்கும் ஒரு தொடர்புபோல் இருப்பதால் அவ்வாறு கடவுளுக்கும் பூமிக்கும் தொடர்பாக இருந்த ஹிந்து முனிவர்களில் முதன்மையாக இருந்த நாரத முனிவரின் பெயர் இடப்பட்டுள்ளதாக தெரிவிக்கிறது அங்கிருக்கும் பெயர்ப் பலகை.

ஆதாரம்: விக்கிபீடியா